مقامی پولیس کے مطابق کمالیہ میں راوی پل کے قریب ٹریلر کی کار سے ٹکر ہو گئی جس کے نتیجے میں کار میں سوار 6 افراد جاں بحق ہو گئے۔
پولیس کے مطابق جاں بحق ہونے والے تمام افراد کا تعلق ایک ہی خاندان سے ہے، جن میں 2 خواتین، 1 بچہ اور 3 مرد شامل ہیں۔
ریسکیو ذرائع کی مدد سے جاں بحق افراد کی لاشوں کو حادثے کا شکار کار سے نکال کر اسپتال منتقل کیا گیا ہے۔
ڈاکٹر فیصل سلطان جو کہ وزیراعظم کے معاون خصوصی برائے صحت ہیں انہوں نے بنیادی ادویات کی قیمتوں میں اضافے پر وضاحت دیتے ہوئے کہا کہ یہ اضافہ ان ادویات کی قیمتوں میں کیا گیا جن کی قیمتیں فکسڈ نرخوں کی وجہ سے بڑھائی نہیں جا سکی تھیں۔
معاون خصوصی نے کہا کہ ماضی میں لوگ ادویات کی عدم دستیابی کے باعث سمگل شدہ ادویات مہنگے داموں خریدنے پر مجبور تھے جن کی دکاندار منہ مانگی قیمت وصول کرتے۔ مگر اب ان ادویات کی قیمتوں میں مناسب اضافہ کر کے ان کی دستیابی کو یقینی بنایا گیا
معاون خصوصی نے کہا کہ جب ضرورتمند لوگ سمگل شدہ ادویات مہنگے داموں خریدتے ہیں وہ اس کے معیار پر بھی سمجھوتہ کر رہے ہوتے ہیں۔ ڈاکٹر فیصل سلطان نے کہا کہ اب ان ادویات کی قیمتوں میں اضافہ بڑا سوچ سمجھ کر کیا گیا ہے۔
ڈاکٹر فیصل سلطان نے بتایا کہ ادویات کی قیمتوں ان کے خام مال اور درآمد پر اٹھنے والے اخراجات کو مدنظر رکھتے ہوئے قیمتوں میں مناسب اضافہ کیا گیا ہے۔ تاکہ ضرورت مند مریض ان ادویات کو باآسانی کسی بھی جگہ سے حاصل کر سکے۔
معاون خصوصی نے مثال کے ساتھ سمجھاتے ہوئے کہا کہ یہ اسی طرح ہے جیسے کسی دوائی کی فکسڈ قیمت 1.50روپے ہو اور اپنی اس قیمت کی وجہ سے وہ مارکیٹ میں دستیاب نہ ہو اور صارف 10 یا 20 گنا زیادہ پیسے دے کر اس دوا کو حاصل کرتا ہے تو یہ اس سے کہیں بہتر ہے کہ اس دوا کی قیمت 5 روپے کر دی جائے اور یہ ہر جگہ باآسانی مل سکے۔
بالی ووڈ اداکارہ دیپیکا پڈوکون این سی بی کے سخت سوالات برداشت نہ کرسکیں، ڈرگ کیس میں این سی بی کے سوالات پر تین بار رو پڑیں، انڈیا ٹوڈے کے مطابق این سی بی کے ذرائع نے بتایا کہ دپیکا پڈوکون سے 6 گھنٹے تفتیش کی گئی، اس دوران اداکارہ دپیکا پڈوکون سخت سوالات پوچھے جانے کے دوران 3 مرتبہ روئیں۔
تفتیش کے دوران دپیکا کی جانب سے اپنی منیجر کرشمہ پراکاش سے منشیات سے متعلق واٹس ایپ چیٹ کا اعتراف بھی کیا گیا جبکہ دپیکا نے منشیات کے استعمال کے تمام دعوؤں کی تردید کر دی۔
دپیکا پڈوکون اور ان کی منیجر کرشمہ پراکاش کی 2017ء میں واٹس ایپ پر کی جانے والی منشیات سے متعلق گفتگو سوشل میڈیا پر وائرل ہو گئی تھی جس میں دیکھا جا سکتا ہے کہ دپیکا پڈوکون منیجر کرشمہ پراکاش سے اپنے لیے منشیات منگوا رہی ہیں۔
دپیکا کی چیٹ وائرل ہونے کے بعد ہی بھارتی تحقیقاتی ادارے نارکوٹکس کنٹرول بیورو نے دپیکا پڈوکون، سارہ علی خان، شردھا کپور اور راکول پریت سنگھ کو سمن جاری کیے تھے۔
دوسری جانب اداکارہ سارہ علی خان اور شردھا کپور نے این سی بی کے عہدیداروں کے ساتھ اپنے سوالات اجلاس کے دوران منشیات کے استعمال سے انکار کردیا ہے۔ تینوں اداکاراؤں کے بیانات سوشانت سنگھ راجپوت کی موت اور بالی ووڈ میں منشیات کے مبینہ گٹھ جوڑ سے منسلک منشیات کی تحقیقات میں ریکارڈ کیے گئے تھے۔
این سی بی نے ہفتے کے روز سوشانت کی موت سے منسلک منشیات کے معاملے میں پروڈیوسر کشیتج روی پرساد کو بھی گرفتار کیا تھا۔ اسے جمعہ کی صبح اسے این سی بی کی ایک ٹیم نے مضافاتی علاقے ورسووا میں واقع اپنی رہائش گاہ سے اٹھایا تھا اور اس کے بلارڈ اسٹیٹ آفس میں سارا دن پوچھ گچھ کی تھی۔ ایجنسی نے اب تک ان معاملات میں کم از کم 18 افراد کو گرفتار کیا ہے۔
اب جو ڈرامہ ٹی وی پر دکھایا جا رہا ہے وہ بیہودہ اور ایک ہی طرح کی کہانیوں پر مبنی ہے، اداکار محب مرزا
اداکار محب مرزا نے اپنے ایک حالیہ انٹرویو کے دوران کہا کہ آج کا ڈرامہ بیہودہ اور مخصوص کہانیوں میں پھنس کر رہ گیا ہے۔ آج کل جو ڈرامے دکھائے جا رہے ہیں اس میں مردوں کے کردار کو کم کر دیا گیا ہے، کہیں اس کو بہت ہی منفی تو کہیں مثبت دکھایا جا رہا ہے۔
اداکار نے کہا کہ جس طرح سے کہانیوں میں رشتوں کا مذاق اڑایا جا رہا ہے میں اس طرح کے رواج کو بڑھاوا دینے کے بہت خلاف ہوں۔ یہ مناسب نہیں ہے کہ ایک مرد پہلے عورت کو تھپڑ مار کر پھر اس سے معافی مانگے، ہم بچوں کو ایسے ڈرامے دکھا کر کیا بتانا چاہ رہے ہیں کہ ہم دروازہ بند کر کے عورت پر ظلم کر سکتے ہیں؟
انہوں نے کہا کہ آج ڈراموں میں بس یہی کچھ دکھایا جا رہا ہے اسی لیے میں ان ڈراموں کے خلاف ہوں اور اسی وجہ سے 4 سال سے کام نہیں کیا۔
محب مرزا نے یہ بھی کہا کہ میں اس بات کا کھل کر اعلان نہیں کرنا چاہتا تھا کہ میں ایسے سکرپٹ کے خلاف ہوں۔ اپنے کام کے ذریعے اس رواج کا خاتمہ چاہتا ہوں۔
جیلیل شرقپوری کے بعد ایک اور لیگی ایم پی اے فیصل خان نے نواز شریف کی تقریر سے اظہار لاتعلقی کر دیا۔
خانیوال سے مسلم لیگ ن کے رکن صوبائی اسمبلی نے فیصل خان نیازی نے نواز شریف کی تقریر کو پاکستان مخالف قرار دیتے ہوئے کہا کوئی بھی محب وطن پاکستانی اس کی حمایت نہیں کر سکتا۔ میں نواز شریف کے اس بیانیے کی پرزور مذمت کرتاہوں اور اعلانیہ طور پر کہتا ہوں میں اس کی حمایت نہیں کرتا۔ اور مجھے یقین ہے کے میرے جیسے کئی محب وطن لیگی ارکان اسمبلی اور کارکن اس تقریر سے ناخوش ہیں۔
نواز شریف کا موجودہ بیانیہ پاکستان مخالف قوتوں کے بیانیے کا عکس ہے اور یہ پاکستان کی حفاظت کرنے والوں کے خلاف ہے۔ یہ بیانیہ پاکستان کی خاطر اپنی جانوں کا نذرانہ پیش کرنے والوں کی توہین ہے۔
یاد رہے کہ اس سے پہلے بھی رکن صوبائی اسمبلی جلیل شرقپوری نے نواز شریف کے تقریر کی مذمت کرتے ہوئے اس بھارت کو خوش کرنے کی کوشش قرار دیا تھا۔ جس مسلم لیگ ن نے جلیل شرقپوری کی پارٹی رکنیت معطل کر دی ہے۔
صحافی مرتضیٰ علی شاہ کا کہنا ہے کہ جس بلڈنگ سے نواز شریف نے اے پی سی میں خطاب کیا وہاں 2 نامعلوم افراد نے موجود اسٹاف کو دھمکیاں دیں اور ہراساں کیا۔
لندن میں جیو نیوز کے نمائندےنے اپنے ویڈیو پیغام میں بتایا نواز شریف نے جس عمارت سے تقریر کی وہاں ان کے باہر نکلنے سے پہلے 2 نامعلوم ٹیکسی ڈرائیورز نے عمارت کے باہر موجود ایک اسٹاف ممبر کو دھمکیاں دیں اور نواز شریف کے خلاف باتیں کی۔
مرتضیٰ علی شاہ نے مزید کہا کہ ایک شخص نے تو یہاں تک کہا کہ ہمارے پاس اسلحہ بھی موجود ہے اور وہ نواز شریف پر حملہ کرسکتے ہیں، واقعے پر فوری طور سیکیورٹی پر معمور افراد نے موقع پر پہنچ کر ان دونوں افراد اور ان کی گاڑیوں کی تصاویر اور ویڈیو بنانا شروع کیں تو وہ دونوں وہاں سے فرار ہوگئے۔
انہوں نے مزید کہا کہ واقعے کی خبریں جب ان دونوں افراد کی تصاویر کے ساتھ شیئر ہونا شروع ہوئیں تو مقامی پولیس اسکاٹ لینڈ یارڈ نے واقعے پر تحقیقات کا آغاز کردیا ہے، اور پولیس یہ جاننے کی کوشش کررہی ہے کہ یہ لوگ کون تھے اور ان کے مقاصد کیا تھے۔
مرتضیٰ علی شاہ نے کہا کہ اس علاقے میں پہلے بھی سیاسی پرتشدد واقعات رونما ہوتے رہتے ہیں جس کے بعد پولیس نے اس علاقے میں غیر معمولی سیکیورٹی نافذ کردی تھی۔
مرتضیٰ علی شاہ نے کہا کہ اس سے قبل ایک اور پیش رفت میں نواز شریف کے اریسٹ وارنٹ حسن نواز کی جانب سے ایون فیلڈ میں وصول کرنے کی خبریں سوشل میڈیا پر وائرل ہیں، جس سے متعلق حسن نواز نے تردید کرتے ہوئے کہا ہے کہ میں نے کسی قسم کے وارنٹس وصول نہیں کیے۔
مسلم لیگ ن کے رہنما طلال چوہدری کی جانب سے اپنی ہی پارٹی کی ایم این اے کو ہراساں کرنے کے معاملے پر پنجاب پولیس طلال چوہدری کا بیان ریکارڈ کرنے کے لیے لاہور کے نیشنل ہسپتال پہنچی، لیکن پولیس کے ہسپتال پہنچنے سے قبل ہی طلال چوہدری وہاں سے ہسپتال کا بل ادا کئے بغیر روانہ ہو گئے۔
خبر رساں ذرائع کے مطابق طلال چوہدری کو ہسپتال کے پچھلے دروازے سے قریبی ساتھی نے فرار کروایا، طلال چوہدری کے ہسپتال سے پولیس کے پہنچنے سے پہلے فرار ہونے پر بتایا جا رہا ہے کہ طلال چوہدری ہسپتال سے جلد بازی میں روانہ ہوئے اور جانے سے پہلے ہسپتال کا بل بھی ادا نہ کیا۔
ڈی ایس پی عبدالخالق کا اس حوالے سے میڈیا سے گفتگو کرتے ہوئے کہنا تھا کہ طلال چوہدری کو ہمارے پہنچنے سے پہلے ہی ہسپتال سے ڈسچارج کر دیا گیا ہے، ہسپتال والوں نے ہمیں بتایا کہ طلال چوہدری کو ایک گھنٹہ قبل ہی ہسپتال سے ڈسچارج کیا جاچکا ہے۔
انہوں نے کہا کہ جلد ہی طلال چوہدری سے رابطہ کر کے ان کا بیان ریکارڈ کرلیا جائے گا، ایک سوال کے جواب میں انہوں نے بتایا کہ ہسپتال کی جانب سے انہیں طلال چوہدری کے ڈسچارج ہونے کی سلپ نہیں دکھائی گئی
